Často pomhach w prózdninach swojej kmótrje na jeje štyristronskim statoku. Wot lěta 1996 saněruju jón krok
po kroku, z wulkej prócu a wutrajnosću.

Historiske statoki mje hižo dawno zajimuja. Mnohe tajke nańdźech ze swojim bratrom w Južnych Čechach,
na Morawje a w Słowakskej, jako tam ze swójbomaj w dowolu přebywachmoj. Tykowane domčki, stare płuhi a traktory mje přeco hižo fascinowachu. Chěže ze stołom … to bě hišće strowe twarske wašnje z hlinu. W zymje bě rjenje ćopło, w lěću chłódno.

Dyrbjach jednać, přetož doma w Hórkach bě statok wot lěta 1988 wopušćeny. Twarjenja wočiwidnje rozpadowachu, ratarske nastroje zerzawjachu.

W lětomaj 1996/97 wobnowich ze swojim bratrom, z dalšimi přiwuznymi a přećelemi jako prěnje bróžnju. Rozpadane wjelby mějachu so zrumować a nowe murjować. W třěše bě wulka dźěra. Wobdźělich so na wubědźowanju “Zachowanje twarskeje substancy ze starymi twarskimi materialijemi”. Po wšej Sakskej je zarjad za wjesne wuwiće tute wubědźowanje  wupisał a připózna staru, originalnje zdźeržanu twarsku substancu.

Wonkowne wobnowjenje njebě tak ćežke. Nutřka pak pobrachowachu špundowanja, hrjady atd. Ratar z Frankenthala mi pomhaše, zatwarić do bróžnje nowu młóćawu.

1998/99 saněrowachmy bydlenski dom, hdźež bě raz moja kmótra bydliła. Z dwaceći ludźimi kryjachmy třěchu. Zdźěla měješe so tykowanje na wonkownych murjach wobnowić. Tež tu wobdźělich so na horjeka mjenowanym wubědźowanju. Prěni raz běch premiju dóstał, tónkróć čestne wopismo.

Po lěće 2000 započachmy něhdyšu hródź saněrować. Wona je najstarše twarjenje z lěta 1786. Horni poschod a kózły buchu ponowjene, nětko stej tam kuchnja a žurla za hač do 80 hosći.
W přizemju su nuzniki.

bywše podawki na statoku:

• kónc awgusta 1998 wotmě so prěnje wulke kulturne zarjadowanje Chróšćanskich muzikantow z čěskej partnerskej kapału „Božejací“
• wot toho časa swjeća tam narodniny, kwasy, křćizna atd.
• hižo dwójce zahrachu tam lajscy dźiwadźelnicy z delnjołužiskeje Hochozy
• hosćo ze wšeje Europy, zastupjerjo unije europskich narodnych mjeńšin, přebywachu na statoku w lěće 2002
• Serbski folklorny ansambl Wudwor woswjeći tu swoje 25lětne wobstaće